حزن هالكون تجمع بكيان انسان

انا يابحر ماجيتك فاضي ولمشاهدك شفقان
انا جيتك ابي انسى اليآس وهموم تباريني
على شانك انا جالس اسامر موجك الغضبان
واسولف له عن اوجاعي وعناي وغربة سنيني
علامك يابحر غاضب علامك تصرخ بكتمان
انا جيتك ابي اشكي لك وابي منك تواسيني
انا جيتك ابي اوصف لك عذاب اتعب الوجدان
عذاب رافق سنيني وعيا لا يخليني
انا مثلك بحر لكن وسط نفسي انا غرقان
تعبت ابحر مع نفسي وانشدها انا ويني
انا مليت من حزني وتعبت ابحث عن السلوان
ولا ظنيت به شي عن احزاني يسليني
انا محتار في فكري مع نفسي انا حيران
انا الاقدار افهمها وهي تجهل مضاميني
احس ان الحزن عالم بحور وصخر ووديان
وتخيل يابحر حجمه اذا كله سكن فيني
تصدق ان حزن هالكون تجمع بكيان انسان
وتصدق مابقى بالكون حزن ماسكن فيني
تدري ان الحزن لو غاب وراح لاخر الاوطان
يغيب ويرتحل لحظات ويرجع يستقر فيني